Оңайсынова Әлия Мырзашқызы
Қызылорда облысы, Қармақшы ауданы, Жосалы кенті №250 мектеп-лицейі Бастауыш сынып мұғалімі
Сыныбы: 2
Мақстаы:
- ананың құдіретті де мейірімді жан екенін түсіндіру, анаға деген сүйіспеншілік сезімдерін арттыру, ана мен бала арасындағы қарым-қатынасты нығайту;
- оқушының сөйлеу,жазу,ойлау қабілеттерін дамыту,өлеңді мәнерлеп оқуға машықтандыру;
- ананы құрметтеп,сыйлай білуге,адамгершілігі мол ізгі ниетті бала болуға тәрбиелеу;
Көрнекілігі: ана туралы суреттер, өлең шумақтары;
Тәрбие сағатының өтілу барысы: І. Ұйымдастыру кезеңі
Мұғалім: Құрметті ұстаз-аналар, оқушылар! Көңілімізге көктем шуағындай сезім мен нұр құйып,тағы да 8-наурыз мерекесі келді. Осынау көркем мерекенің қай кезде де орны бөлек. Олай дейтініміз,аналарға деген ыстық сезім, алғыс пен құрмет ешқашан сөнбек емес. Ана-әрбір адамның жарық дүниедегі ең жақыны, жанашыры, қадірлісі, қамқоршысы, ақ сүтін емізіп аялаған, жанын да аямаған ардақтысы.
Ана-жүрек, жүректі құдіретте,
Ана-тірек,тіректі құрметте.
Ана-шыңың, шыңыңа сағынып жет,
Ана-күнің,күніңе табынып өт.
Расында да адамның әдептілігі мен жан дүниесінің сұлулығы ең алдымен балаға ақ сүтін беріп, әлпештеп өсірген ана жүрегінің жылуынан басталады.
Бойымыздағы ең жақсы қасиеттер бізге алдымен анадан тарайды. Ананың нәзік үні, жұмсақ та аялы алақаны, жан жылуымен аялауы бізді әлдилеп жұбатады, көңілімізді сергітеді. Қайран ана өз перзентін әдімі не ұсқынсыз, ақылды не ақымақ, мейірімді не рақымсыз, кесір -қырсық болса да бәрібір шексіз сүйеді.
Бүгінгі мерекелік тәрбие сағатымыз аналарға арналмақ. Тәрбие сағатымыздың тақырыбы: «Әлемнің жарығын сыйладың Сен маған...»
- ой қозғау
- Ана туралы өз ойымызды ортаға салайық. (оқушылардың аналар туралы ойларын тыңдау)
- Мұғалім: Ендігі сөз кезегін Айгерім мен Дінмұхаммедке беремін.
1-жүргізуші: Армысыздар құрметті ұстаздар мен оқушылар! Адамның әдептілігімен жан дүниенің сұлулығы, ең алдымен балаға ананың ақ сүтінен, ана жүрегінің жылуынан дарыған. Ана - барлық өмірдің бастауы. Ана -ұлы адам, Ана-құдіретті жан, құрметті Аналар, ұстаздар, арулар бүгінгі мерекелеріңізбен шын жүректен құттықтаймыз!
2-жүргізуші: Бүкіл әлем аналардың ақ сүтінен нәр алған
Бүкіл әлем аналардың үмітінен таралған
Әлемде сен болмасаң осылайша
Туар ма еді жүрегімде биік мақсат, игі арман
Адам баласы үшін ең аяулы, ең қастерлі, қадірлі сөз - ана. Бала дүниеге келген күннен бастап өзінің жұмсақ алақаны, жылы жүзі, ыстық құшағы, мейірім толы көзқарасы арқылы барлық сүйіспеншілік, мейірімділік, махаббатын бере білген анамызға деген біздің көңіліміз, мейіріміміз ұшан теңіз. Анамыздың көңілі шат, жүзі жарқын, дені сау болуын әрқашан тілейміз. Сіздерді аналар мерекесімен шын жүректен құттықтаймыз.
1-жүргізуші:
Болар күнде алаң,
Жанашыр кім саған?
Бәрі:Анам
2-жүргізуші:
Болсаң егер жаман,
Кейитін кім саған?
Бәрі:Анам
1-жүргізуші:
Таң қалғандай ғалам,
Кім ең сұлу адам?
Бәрі:Анам
2-жүргізуші:
«Боташым» дер саған,
Кім сүйікті адам?
Бәрі:Анам
ІІ Жаңа сабақ
Мұғалім: Балалар, Сіздерге «Ана мейірі» деп аталатын шағын ғана әңгімені оқып өткіп келіп тұр. Назар аударып тыңдайық.
- Ой толғаныс кезеңі.
Әңгімеден қандай әсер алдыңыздар, қандай ой түйдіңіздер?
- Оқушылардың аналарға арналған өлең шумақтары
Құралай
Адам бар ма ана сүтін татпаған
Алуан – алуан ауыр сынды аттаған
Адалдықты ар – намысты сақтаған
Мен анамның сонысына мақтанам!
Туғаннан құлыным деп, аймалаған
Өзіңнен қымбат адам қайда маған
Дүние аналармен көрікті ғой,
Онсыз бір бұлбұл да сайрамаға.
Тыныштық баршамыздың ұранымыз,
Мәңгілік таусылмайтын жыр – әніміз.
Назым
Дүниедегі ең ардақты асыл жан,
Анам менің мәпелеген жасымнан.
Мен қуансам қуанады ол бірге,
Мен қиналсам табылады қасымнан.
Маған қымбат жан жоқ сірә анадан,
Бар жақсылық аналардан тараған.
Жер бетіне өмір нәрін себуші.
Ана алдында борышты ғой бар адам.
Тұрар
Жамандықтан сақтандырып,
Жақсы ісімді мақтан қылып.
Мәпелелеген ақ мамамды,
Жүрсем деймін шаттандырып.
Еркелесем, күлімдейтін,
Ұрысқаны білінбейтін.
Маңдайымнан иіскеп менің,
«Құлыншағым, күнім», - дейтін.
Айналайын, анашым,
Көкте нұр боп жанасың.
Ет жүрегің елжіреп,
Құшағыңа аласың.
Айналайын, анашым,
Аялайсың, бағасың.
Менің үшін не керек –
Бәрін іздеп табасың.
Сен жалықпай жетектеп,
Мен жаттыға жетермін.
Айтқаныңды екі етпей
Ақ сүтіңді өтермін.
Көрсетемін күллі елді,
Жарық етем түндерді.
Өсіріп мен сыйлаймын
Жұрт көрмеген гүлдерді,- дей отырып аналар мен ұстаздарға гүл шоқтарын ұсынамыз.
- Бір топ оқушылардың аналарға арналған әні
«Анашым» Мадина,Әбілмансұр,Жансая,Мақсат,Ерасыл
«Апама» Бір топ ер балалар
- Көрініс көрсету
- «Дүниеде не қымбат?»
- «Анама хат»
(оқушылардан көріністен не ұғынғандарын сұрау)
Мұғалім:
- Бір кішкентай қыз көшеде анасынан адасып қалыпты.Ол анасын іздеп жылап келе жаты.Сол кезде қасына бір бала тоқтап былай дейді:
- Сен жылама,мен сені анаңа алып барамын.Сенің анаң қандай еді?
Сонда қыз жылап тұрып: Менің анам ең жақсы адам,ол бәрінен де жақсы !-депті
Ал сендерге сұрақ:Анамызды не үшін жақсы көреміз?
- «Менің анам»тақырыбына эссе жаздыру.
- Оқушылардың жазған эсселерін оқыту.
ІІІ.Қорытындылау
2-жүргізуші: «Аналар адамды бесіктен бастап баулиды, өмірдің ірге тасы солардың қолымен қаланады» деген ұлы ғұламалардың сөзі бар. Шынымен солай. Адамзат жүріп өткен небір ауыр жол, алмағайып заманнан ұрпағын аман есен бүгінгі күнге жеткізген әйел ана құдіретін жырмен өрнектеп, әнмен әлпештеп, сөзбен айтып тауысу мүмкін емес.
1-жүргізуші: Барлықтарыңызды айтулы мерекемен шын жүректен құттықтаймыз! Сіздерге және отбасыларыңызға мол береке, бақыт, шаттық, мызғымас денсаулық, болашаққа зор сенім, көтеріңкі көңіл-күй тілейміз! Жылдан-жылға табиғаттың тамаша мерзімі – көктемдей құлпырып, жасара беріңіздер!
- Барлық оқушы хормен ана туралы ән айтады.